Tíðindi

fimmtudagurinn 25. maí 2017

Heilsufarsskoðun starfsmanna.

Heilsubankinn í samstarfi við SÍBS komu í vinnslu Hraðfrystihússins-Gunnvarar hf. í dag og bauð þeim starfsmönnum sem vildu upp á heilsufarsskoðun. Í heilsufarsskoðuninni var meðal annars mældur blóðþrýstingur, blóðfita, blóðsykur og súrefnismettun auk þess sem starfsfólki var boðið að taka þátt í könnun um lífsstíl og heilsufar. Mikil ánægja var meðal starfsmanna með verkefnið og tóku allir starfsmenn í vinnslunni í Hnífsdal þátt, auk sjómanna af ísfisksskipum félagsins.

Hraðfrystihúsið – Gunnvör hf. þakkar Heilsubankanum og SÍBS kærlega fyrir komuna.

fimmtudagurinn 20. apríl 2017

Gleðilegt sumar!

Hraðfrystihúsið - Gunnvör hf. óskar starfsfólki sínu gleðilegs sumars.

Áralöng hefð er fyrir því að unnið sé á sumardaginn fyrsta í bolfiskvinnslu félagsins í Hnífsdal og sumardagsfríið tekið út daginn eftir. Með því nær starfsfólkið lengra helgarfríi. Það eru félagar í  Kvenfélaginu Hvöt í Hnífsdal sem sjá um veglegt bakkelsi með sumardagskaffinu og ágóðinn rennur síðan til góðra málefna í nærsamfélaginu. Sumar og vetur frusu saman en þegar slíkt gerist segir íslensk þjóðtrú að það boði gott sumar.

föstudagurinn 3. mars 2017

Skipsnafnið Júlíus Geirmundsson ÍS 270 í hálfa öld

Skipsnafnið Júlíus Geirmundsson ÍS 270 hefur nú verið samfleytt í hálfa öld og fjögur skip borið það hingað til. Fyrsta skipið með þessu nafni kom til heimahafnar á Ísafirði þann 2. mars 1967 eða fyrir sléttum fimmtíu árum. Lauslega áætlað hafa þessi fjögur skip borið að landi rúmlega 200 þúsund tonn af fiski.

Nánar má lesa um sögu nafnsins hér.

þriðjudagurinn 14. febrúar 2017

Tími í verkfalli nýttur til menntunar og menningar

Eftir að starfsfólk botnfiskvinnslu Hraðfrystihússins-Gunnvarar hf. lauk fiskvinnslunámskeiðum fyrir áramót bauð  fyrirtækið starfsfólki sínu að sitja íslenskunámskeið í verkfallinu. Í síðustu viku luku 30 starfsmenn 30 stunda námi i íslensku á vegum Fræðslumiðstöðvar Vestfjarða. Haldið var upp á árangurinn með thailensku matarþema í gær þar sem nokkrir starfsmenn af thailenskum uppruna elduðu og kynntu samstarfsfólki sínu thailenska matargerð. Þeir starfsmenn sem höfðu áhuga á að bæta íslenskuþekkingu sína ennfrekar hófu nýtt íslenskunámskeið í morgun.

Hraðfrystihúsið-Gunnvör hf. er fjölmenningarlegur vinnustaður og með íslenskunámskeiði er fyritækið að stuðla að bættri íslenskufærni starfsmanna sinna og auðvelda þar með aðlögun að bæði vinnustaðnum og samfélaginu.

föstudagurinn 3. febrúar 2017

Útskrift skipstjórnarmanna hjá HG

Skipstjórar og stýrimenn á skipum Hraðfrystihússins-Gunnvarar útskrifuðust í dag úr 150 stunda námsbraut „Sterkari starfsmaður – upplýsingatækni og samskipti“ á vegum Fræðslumiðstöðvar Vestfjarða.

HG óskar skipstjórnendum til hamingju með námsárangurinn og jákvætt viðhorf gagnvart verkefninu. Auk þess að vera efling námslega þá voru stjórnendur HG og skipstjórnendur á því máli að námið hafi einnig bæði styrkt tengsl milli áhafna á skipum og fiskvinnslunnar í landi.

Sterkari starfsmaður – upplýsingatækni og samskipti er ætlað fólki á vinnumarkaði sem vill auka færni sína til að takast á við breytingar í starfi og stuðla að jákvæðu viðhorfi námsmanna til starfa, nýjunga, upplýsingatækni, samskipta og símenntunar og gera þá eftirsóknarverðari starfsmenn.

Þetta var yfirgripsmikið og fjölbreytt nám. Upphaflega var megináherslan lögð á aukna tölvufærni í word, excel, outlook. Samhliða því var komið inn á leiðtogafærni, mannauðsstjórnun og vinnustaðamenningu. Farið var yfir virðiskeðjuna þar sem rætt var um meðferð afla og gæðastjórnun. Einnig voru fyrirlestar frá Hafrannsóknarstofnun, um veiðarfæri atferli fiska og hafstrauma í kringum landið.

Fræðslumiðstöðin hefur undanfarin ár byggt upp sitt námsframboð og lagt m.a. áherslu á að þjálfa upp kennara af svæðinu til þess að kenna fjölda námskeiða og voru námskeiðin því að mestu leyti kennd af heimafólki.
Þakkir eru færðar Fræðslumiðstöð Vestfjarða fyrir samstarfið, sem brást við óskum um námskeiðið með litlum fyrirvara og aðlagaði námsefnið einstaklega vel að þörfum námshópsins.