Þorskstofninn við Ísland er í örum vexti eins og nýjustu rannsóknir Hafrannsóknastofnunar staðfesta.  Þetta hefur meðal annars leitt til þess að fiskur yfir 6 kg. er orðinn sífellt stærri hluti afla ísfisktogara Hraðfrystihússins - Gunnvarar  hf. og var á síðasta ári um  7-8% eða um 300 tonn.   Þessi stóri fiskur hefur undanfarin ár verið seldur á fiskmarkaði til saltfiskframleiðanda enda hefur markaður verið góður fyrir þann fisk í ár og áratugi.  Nú hafa efnahagserfiðleikar í Suður-Evrópu orðið til þess að verð á stórum fiski á ferskfiskmörkuðum hefur lækkað mikið.

Til að bregðast við þessu hefur Hraðfrystihúsið - Gunnvör hf. tekið í notkun Baader flökunarvél, sem er sérstaklega hönnuð til flökunar á fiski allt að 13 kílóum að þyngd og gefur því möguleika á að vinna úr honum  verðmætar afurðir í frystihúsi félagsins  í Hnífsdal.

Á síðastliðnu ári var unnið úr um 5.700 tonnum af hráefni í landvinnslu H-G í Hnífsdal og Ísafirði.  Nú fyrir skömmu var ísfisktogaranum Páli Pálssyni ÍS 102 úthlutað byggðakvóta  Hnífsdals fyrir yfirstandandi fiskveiðiár og er hann alls um 180 þorskígildistonn.   Þetta er mikil aukning frá fyrri árum og skapar möguleika til að auka landvinnslu H-G í Hnífsdal.   

Þessir tveir þættir leiða til þess að vinnslutíma þarf að lengja tímabundið og fjölga  starfsfólki. Fyrirhugað er að stytta hefðbundið sumarstopp miðað við það sem verið hefur.  Því er nú leitað að vönu starfsfólki í snyrtingu og pökkun.

Mikilvægir markaðir fyrir frosnar og ferskar afurðir landvinnslunnar hafa verið erfiðir síðastliðið ár ekki síst vegna efnahagserfiðleika og mikils atvinnuleysis, sérstaklega í sunnanverðri í Evrópu.   Við þessu hefur verið brugðist með því að beina sjónum í auknum mæli að Bandaríkjamarkaði og hefur það gefist vel.   Þó framboð af fiski sé mikið, sérstaklega vegna vorvertíðar í Noregi, hefur tekist þokkalega að selja afurðir það sem af er ári.

Til baka