Tíðindi

föstudagurinn 15. febrúar 2013

Hraðfrystihúsið-Gunnvör hf hlýtur forvarnarverðlaun TM

Hraðfrystihúsið-Gunnvör í Hnífsdal hlaut í gær forvarnarverðlaun Tryggingamiðstöðvarinnar fyrir árið 2012. Tryggingamiðstöðin hefur veitt forvarnarverðlaunin Varbergið frá árinu 1999, en þau eru veitt þeim fyrirtækjum sem þótt hafa skara fram úr á sviði forvarna gegn óhöppum og slysum.

"Þetta er mikið ánægjuefni og fyrst og fremst erum við geysilega stolt af þessu. Starfsfólkið okkar er lykillinn að þessari viðurkenningu," segir Einar Valur Kristjánsson framkvæmdastjóri Hraðfrystihússins Gunnvarar í Hnífsdal, en hann veitti verðlaununum viðtöku úr hendi Sigurðar Viðarssonar forstjóra Tryggingamiðstöðvarinnar í hádegishléi starfsmanna.

Einar Valur segir það markmið fyrirtækisins að vinna markvisst að auknu öryggi starfsmanna sinna. „Lykillinn hjá okkur er fyrst og fremst lítil starfsmannavelta. Okkar starfsmenn halda vel utan um hlutina og hvern annan, t.d. eru þetta mikið til sömu mennirnir á skipunum okkar. Þetta er klapp á bakið og segir okkur að við séum að gera rétt."

Um Hraðfrystihúsið Gunnvöru hf. segja sérfræðingar TM í forvörnum að fyrirtækið búi að öflugri liðsheild starfsmanna sem leggja grunninn að því að öllum framleiðslu, gæða- og öryggisstuðlum sé fullnægt. Að mati sérfræðinga TM er öryggishegðun mjög sterk innan HG, því fyrirtækið hefur lent í fáum slysum. Öryggisvitund og forvarnir skili árangri sem um munar, sem felist í fækkun slysa og veikinda.

miðvikudagurinn 9. janúar 2013

Afli og aflaverðmæti skipa 2012

Á árinu 2012 lönduðu skip Hraðfrystihússins-Gunnvarar hf. 11.916 tonnum að verðmæti 3.605 milljónum króna samanborið við 11.512 tonn að verðmæti 3.324 milljónir árið 2011.
Aukning varð á afla um 4% og aflaverðmæti jókst um 8% á milli ára og voru laun og launatengd gjöld 1.343 milljónir eða 37% % af aflaverðmæti ársins.

Útgerð skipanna gekk vel, Páll Pálsson og Stefnir voru frá veiðum vegna hefðbundinnar slipptöku síðastliðið sumar en að jafnaði eru skipin tekin í slipp annað hvert ár til eftirlits og viðhalds.

 

Afli skipa

	2012	2012	2011
Júlíus Geirmundsson	4.380 tonn	1.857 mill.	1.624 millj.
Páll Pálsson	4.699 tonn	968 mill.	864 millj.
Stefnir	2.789 tonn	770 mill.	794 miljl.
Valur	48 tonn	9,7mill.	42 millj.
Samtals.	11.916 tonn	3.605 mill.	3.324 mill.

Síðustu ár hafa verið ein bestu ár íslensks sjávarútvegs frá upphafi. Þessa góðu afkomu má helst rekja til hagstæðs afurðaverðs og góðrar veiði. Miklar blikur eru þó á lofti sem vert er að taka alvarlega. Á seinni helmingi ársins 2012 hafa afurðaverð á mikilvægustu afurðum félagsins gefið verulega eftir auk þess sem íslensk stjórnvöld hafa brugðið fæti fyrir íslenska útgerð með ófyrirséðum afleiðingum.

Það er stundum sagt að skynsöm fjármálastjórn snúist um að grynnka á skuldum í góðæri til að geta búið sér í haginn fyrir kreppu. Íslensk sjávarútvegsfyrirtæki hafa einmitt gert þetta síðustu ár. Með þessu hefur verið lagður grunnur að því að styrkja fyrirtækin og þar af leiðandi byggðirnar allt í kringum landið. Margföldun veiðigjaldsins er ekkert annað en millifærsla á milljörðum króna frá landsbyggðinni til höfuðborgarinnar.

fimmtudagurinn 27. desember 2012

Skatan frá Svenna Bjartar fer víða.

Skata frá Svenna Bjartar var á borðum hjá Margréti Ingimarsdóttdóttur úr "Spýtuhúsinu" í Hnífsdal og fjölskyldu hennar í Luxemborg líkt og verið hefur í hartnær fjörtíu ár.

Það var samdóma álit matargesta að skatan hafi að þessu sinni verið mild og afar bragðgóð og því fallið mjög vel að hinni ströngu matvælareglugerð Evrópusambandsins.

Magga og hennar fólk þakkar Svenna kærlega fyrir afbragðs góðan mat og sendir honum, fjölskyldu hans svo og öllum heima sínar bestu jólakveðjur með ósk um farsælt nýtt ár.

föstudagurinn 21. desember 2012

Skötuveisla starfsfólks Hraðfrystihússins – Gunnvarar hf.

Árleg skötuveisla fyrir starfsfólk Hraðfrystihússins - Gunnvarar hf. var haldin í hádeginu í dag og fjölsótt að vanda. Eins og vanalega hefur Sveinn Guðbjartsson verkstjóri veg og vanda að því að nóg sé af góðri skötu og segir að í ár sé hún mild, en samt ágætlega bragðsterk eins og vera ber. Hráefnið er tindabikkja af togurum fyrirtækisins.

Hraðfrystihúsið - Gunnvör hefur í gegnum tíðina reynt eftir megni að styðja við samfélagsleg verkefni í heimabyggð. Að undanförnu hefur verið leitað leiða til að kaupa nýja stóla í mat- og samkomusal Hlífar, íbúða aldraðra á Ísafirði. Ákveðið var að styðja við verkefnið og í skötuveislunni í dag afhenti Kristján G. Jóhannsson, stjórnarformaður H-G, fulltrúum Hlífar þeim Ingibjörgu Kjartansdóttur deildarstjóra og Brynhildi Halldórsdóttur myndarlegt framlag til kaupanna.

Hraðfrystihúsið - Gunnvör hf. óskar starfsfólki, viðskiptavinum og öðrum velunnurum gleðilegra jóla og farsæls nýs árs, með þakklæti fyrir samstarfið á árinu.

fimmtudagurinn 1. nóvember 2012

Styrkir til björgunarsveita og Heilbrigðisstofnunar Vestfjarða

Hraðfrystihúsið - Gunnvör hf. afhenti nokkrum aðilum í heimabyggð styrki. Þeir sem hlutu styrkina eru: Björgunarsveitin Tindar í Hnífsdal, Björgunarsveitin Ernir í Bolungarvík og Björgunarfélag Ísafjarðar, auk þess sem Björgunarfélagi Ísafjarðar var veittur sérstakur fjárstuðningur vegna sjálfboðavinnu félaga sveitarinnar í tengslum við þakskipti á fasteignum HG í Hnífsdal í sumar. Þá var Heilbrigðisstofnun Vestfjarða á Ísafirði einnig afhent fullkomið sjúkrarúm með sérstakri loftdýnu til varnar legusárum og fjölnota hjólaborði.

„Það er okkur hjá Hraðfrystihúsinu-Gunnvöru mikill heiður að geta sutt við bakið á góðu starfi í heimabyggð. Það þarf ekkert að fjölyrða um mikilvægi björgunarsveitanna og heilbrigðisstofnunarinnar fyrir nærsamfélagið hér á Vestfjörðum. Því vildum við sýna hug okkar í verki", segir Einar Valur Kristjánsson, framkvæmdastjóri Hraðfrystihússins-Gunnvarar.
Í tilefni dagsins var boðið til kaffiveitinga í kaffisal fyrirtækisins í Hnífsdal miðvikudagskvöldið 31. október.