Tíðindi

mánudagurinn 16. júlí 2012

Enn mettúr hjá Júlíusi

Júlíus Geirmundsson ÍS 270, frystitogari Hraðfrystihússins - Gunnvarar hf. kom til heimahafnar í gærkvöldi með lang verðmætasta afla, sem hann hefur borið að landi í einni veiðiferð. Veiðiferðin stóð í 39 daga og aflinn upp úr sjó 830 tonn að verðmæti 360 milljónir króna, eða rúmar 9 milljónir að meðaltali á úthaldsdag. Uppistaða aflans er grálúða og ufsi. Við komu skipsins var efnt til grillveislu á hafnarbakkanum fyrir áhöfn skipsins og fjölskyldur þeirra og tókst hún með ágætum. Körfuknattleiksfélag Ísafjarðar (KFÍ) sá um veitingar með glæsibrag og tónlistarmaðurinn Baldur Geirmundsson hélt uppi fjörinu með harmonikkuleik.

Júlíus heldur til makrílveiða á sunnudag.

miðvikudagurinn 11. júlí 2012

Nýr veltitankur um borð í Stefni.

Stefnir ÍS 28, ísfisktogari Hraðfrystihússins - Gunnvarar hf. kom til hafnar á Ísafirði í dag með um 50 tonn. Uppistaða aflans er þorskur og ufsi, sem fer til vinnslu í frystihúsi félagsins í Hnífsdal. Undanfarnar vikur hefur Stefnir verið í slipp vegna reglubundins viðhalds. Meðal annars var settur veltitankur fyrir framan brú skipsins, sem á að draga úr veltingi og bæta þar með vinnuaðstöðu áhafnarinnar.

Algengt er að settir séu veltitankar á skip, en þessi er sérstakur að því leyti að hann er úr plasti og sá fyrsti sinnar tegundar í skipi hér á landi. Sævar Birgisson skipatæknifræðingur hjá Skipasýn ehf. hannaði tankann en Ausus ehf. í Þorlákshöfn smíðaði hann og í viðtali við Fiskifréttir sagði Ingimundur Árnason framkvæmdastjóri félagsins m.a.
"Hingað til hafa veltitankar verið smíðaðir úr stáli en plasttankurinn hefur það fram yfir stáltankinn að hann tærist ekki og er auk þess miklu léttari. Þá er hann einangraður og því frýs miklu síður í honum á veturna en hætt er við krapamyndun í stáltönkum þegar þeir eru ofan dekks."  (Fiskifréttir 21. júní 2012)

Blíðuveður var í fyrstu veiðiferðinni þannig að ekki reyndi mikið á hinn nýja búnað.

miðvikudagurinn 11. júlí 2012

Fyrsti makríltúr ársins

Páll Pálsson ÍS 102, ísfisktogari Hraðfrystihússins - Gunnvarar hf. landaði á Flateyri í morgun um 60 tonnum af makríl, sem hann fékk út af Breiðafirði.
Þetta er fyrsti makríltúr ársins og verður aflinn heilfrystur í Íshúsfélagshúsinu, fiskvinnslu H-G á Ísafirði. Til að framleiða hágæðavöru úr makríl þarf að vanda til verka bæði í veiðum og vinnslu. Veiðiferðirnar eru stuttar og landað á Flateyri til að koma aflanum sem fyrst í vinnslu. Unnið er sleitulaust við frystingu meðan hráefni er til staðar. Á síðastliðnu ári veiddu skip félagsins tæp tvö þúsund tonn af makríl og hefur hann því verið góð búbót.
Páll hélt aftur til makrílveiða að lokinni löndun. 

föstudagurinn 29. júní 2012

Millilandasiglingar

Brunnbátur Hraðfrystihússins - Gunnvarar hf., Papey, er væntanleg til heimahafnar í Súðavík á sunnudaginn. Undanfarnar vikur hefur skipið flutt laxaseiði frá Grindavík og Þorlákshöfn til Suðureyjar í Færeyjum. Papey er 150 tonn að stærð og hefur verið í eigu félagsins um nokkurra ára skeið og nýst vel við þorskeldi þess. Að sögn fróðra manna eru mörg ár síðan vestfirskt flutningaskip hefur verið í millilandasiglingum. Fjögurra manna áhöfn er á Papey og skipstjóri er Barði Ingibjartsson.

miðvikudagurinn 30. maí 2012

Frá störfum næstu vikur af völdum slyss.

Framkvæmdastjóri félagsins, Einar Valur Kristjánsson, verður frá störfum næstu vikur af völdum slyss, sem hann varð fyrir. Einar vill þakka fyrir góðar kveðjur víða að og ítrekar þakkir fyrir snögg viðbrögð björgunarsveita og annarra, sem komu honum til aðstoðar eftir slysið.
Þeim sem þurfa að hafa samband við Hraðfrystihúsið - Gunnvöru er bent á að hafa samband við Helgu Jóakimsdóttur skrifstofustjóra (helgaj@frosti.is) eða Kristján G. Jóakimsson, vinnslu- og markaðsstjóra (kgj@frosti.is)

m.b.k. Kristján G. Jóhannsson