Hraðfrystihúsið-Gunnvör hf.
Átta starfsmenn H-G voru heiðraðir á föstudaginn fyrir langan og farsælan starfsferil hjá fyrirtækinu. Sá sem lengstan starfsaldur á að baki í þeim hópi hóf störf árið 1964 eða fyrir 47 árum.
Á laugardaginn mætti vel á annað hundrað gesta í opið hús í H-G í Hnífsdal. Verður að segjast að það kom okkur þægilega á óvart hve margir lögðu leið sína hingað til að kynna sér fyrirtækið. Menn höfðu gjarnan orð á því að starfsemin væri mun umfangsmeiri og fjölbreyttari en þeir hefðu gert sér grein fyrir og þeir færu því öllu fróðari af vettvangi. Þar með var tilgangnum líka náð með opna húsinu.
Við þökkum gestum okkar í Edinborgarhúsi og í Hnífsdal kærlega fyrir komuna og starfsfólki H-G fyrir þátt sinn í að gera tímamótin í sögu fyrirtækisins bæði afar ánægjuleg og eftirminnileg.
Það var einmitt 19. janúar 1941, fyrir nákvæmlega sjö áratugum, sem Hraðfrystihúsið hf. var formlega stofnað á skrifstofu Kaupfélags Hnífsdælinga. Sautján manns voru þar saman komnir til að samþykkja nýja félaginu lög og kusu fyrstu stjórn þess: Pál Pálsson formann og Elías Ingimarsson og Hjört Guðmundsson meðstjórnendur. Þar var lagður grunnurinn að því öfluga fyrirtæki sem HG síðar varð og Einar Valur segir að vissulega fari margt í gegnum hugann á þessum tímamótum.
„Uppbygging og rekstur fyrirtækisins hefur ekki gengið átakalaust og verið barningur á köflum. Þess vegna verður manni auðvitað hugsað til frumkvöðlanna að stofnun þessa félags á styrjaldarárunum, fyrir stofnun lýðveldis á Íslandi. Sjötíu ár eru í sjálfu sér ekki langur tími en það er samt ekki sjálfgefið að fyrirtæki lifi svo lengi. Tilfinningar eru líka blendnar nú þegar horft er til þess hve mikil óvissa ríkir um framtíð sjávarútvegsfyrirtækja og sjávarútvegsins yfirleitt sem atvinnugreinar. Það er stærsta ógnin sem steðjar að okkur sem störfum í greininni. Við báðum ekki um kvótakerfið á sínum tíma en því fyrirkomulagi var komið á og það er staðreynd. Þeir sem með landsstjórnarmálin fara boða nú í síbylju að leysa beri upp fiskveiðistjórnarkerfið með tilheyrandi afleiðingum fyrir sjávarútvegsfyrirtækin og samfélagið allt. Slíkt skapar óvissu sem í sjálfu sér er orðin efnahagsvandamál og það af mannavöldum. Vissulega er gaman í afmælisveislum en óneitanlega er óvissuástandið í rekstrarumhverfinu skarð í gleðina."
